تم ہی بتائو اس محفل میں مجھ سے بہتر کتنے ہیں
لب پر میٹھے بول ہیں جن کے دل میں خنجر کتنے ہیں
قدر نہیں ہے اس دنیا میں فن کے لعل و گوہر کی
شہرت کے ہر بام پہ یارو کنکر پتھر کتنے ہیں
آئو چل کر ہم ہی پوچھیں اہلِ سیاست سے یارو
ایوانوں میں بیٹھنے والے امن کے پیکر کتنے ہیں
کل تو ٹھاٹھیں مار رہا تھا سر کا سمندر سڑکوں پر
آج ذرا ہم چل کر دیکھیں دار پہ اب سر کتنے ہیں
اہلِ بصیرت بھانپ ہی لینگے فن کے ہر اک پہلوکو
فکر کے تیرے سیپ میں مضطرؔ لعل و گوہر کتنے ہیں
********************************