فضائے شبنمی میں جب کلی کوئی نکھرتی ہے 
حریمِ دل میں چپکے سے تری صورت ابھرتی ہے
بدلتی رہتی ہے یہ زندگی کیا کیا نہ رنگ اپنا
تڑپتی ہے، سسکتی ہے، بکھرتی ہے، سنورتی ہے 
چھپا لو درد تم اپنا تبسّم  لا کے ہونٹوں پر
کہانی اَن کہی یہ آنکھ لیکن کہہ گذرتی ہے 
غموں کی دھوپ میں تپ کر نکھر جائو گے تم ایسے
کہ جیسے کانٹوں میں رہ کر کلی کوئی نکھرتی ہے
قسم کھائی تھی تم نے، جب نہ آنے کی اِدھر ہمدم
تمہاری یادوں کی خوشبو اِدھر سے کیوں گذرتی ہے
ہوا ہوں جب سے دنیا میں اسیرِ عشق اے مضطرؔ
مرے دامن میں آنے سے خوشی پہلے ہی ڈرتی ہے
****************************