خوں میں جب جب نہاتی رہی زندگی
ہر قدم مسکراتی رہی زندگی
اپنا وعدہ نبھاتی رہی زندگی
قصّۂ غم سناتی رہی زندگی 
یہ نہ پوچھو کہ کیسے کٹی ہے مری 
عمر بھر آزماتی رہی زندگی
قصّۂ زندگی بس، ہے یہ مختصر
لمحہ لمحہ رُلاتی رہی زندگی
جب بھی چاہا کہ ہو دسترس میں مری
ناز و غمزے دکھاتی رہی زندگی
تیری یادوں نے ایسا اجالا کیا
رات بھر جگمگاتی رہی زندگی
چاند سا تیرا مکھڑا جو تھا سامنے
چاندنی میں نہاتی رہی زندگی
*************************