* واقف ہیں گو رقیب کے رازِ نہاں سے ہم *
واقف ہیں گو رقیب کے رازِ نہاں سے ہم
ظاہر کریں گے پھر بھی نہ اپنی زباں سے ہم
گم ہوتے جارہے ہیں تری داستاں سے ہم
بے نام اٹھائے جائیں گے شاید جہاں سے ہم
ہم سے برت رہا ہے تغافل وہ ان دنوں
پھر بھی امید رکھتے ہیں نا مہرباں سے ہم
چھائی ہوئی چمن میں ہے ہر سو اُداسیاں
نغمہ سنیں گے اب کہاں گل کی زباں سے ہم
بھر دیں گے ان کی مانگ میں خوشیوں کے قمقمے
مانگیں گے اب نہ قرض کبھی کہکشاں سے ہم
منزل کا ہے نشاں نہ رہبر پہ اعتماد
پھر کیوں نکل نہ جائیں بھلا کارواں سے ہم
برقِ تپاں کی زد پہ ہیں، مضطرؔ تو کیا ہوا
نکلیں گے بعدِ مرگ ہی اب آشیاں سے ہم
*********************************** |