Tamannaaon men ulajhaayaa gayaa huun
khilaune deke bahalaayaa gayaa huun
huun is kuuche men har zarre se aagaah
idhar se muddaton aayaa gayaa huun
dil-e-muztar se puuchh ai raunaq-e-bazm
main Khud aayaa nahiin laayaa gayaa huun
saveraa hai bahut ai shor-e-mahashar
abhii bekaar uthavaayaa gayaa huun
lahd men kyuun na jaauun muunh chhupaaye
bharii mahafil se uthavaayaa gayaa huun
kujaa main aur kujaa ai "Shad" duniyaa
kahaan se kis jagah laayaa gayaa huun
******************