نعت

جوش ملیح آبادی

اے کہ ترے جلال سے ہِل گئی بزم کافری
رعشۂ خوف بن گیا رقصِ بتانِ آذری
اے کہ ترا غبار راہ تابش روئے ماہتاب
اے کہ ترا نشانِ پا نازشِ مہرِ خاوری
اے کہ ترے بیان میں نغمۂ صلح آشتی
اے کہ ترے سکوت میں خندۂ بندہ پروری
چھین لیں تو نے مجلسِ شرک وخودی سے گرمیاں
ڈال دی تو نے پیکرِ لات و ہبل میں تھرتھری
تیرے قدم پہ جبہ سا روم وعجم کی نخوتیں 
تیرے حضور سجدہ ریزچین و عرب کی خودسری
تیری پیمبری کی یہ سب سے بڑی دلیل ہے
بخشا گدائے راہ کو تو نے شکوہِ قیصری
چشمہ ترے بیان کا غارِ حرا کی خامشی
نغمہ ترے سکوت کا نعرۂ فتحِ خیبری
تجھ پہ نثار جان و دل مڑ کے ذرا ادھر تو دیکھ
دیکھ رہی ہے کس طرح ہم کو نگاہِ کافری
تیرے فقیراور دیں کوچۂ کفر پر صدا
تیرے غلام اور کریں اہلِ جفا کی چاکری
اٹھ کہ ترے دیار میں پرچمِ کفر کُھل گیا
دیر نہ کر کہ پڑ گئی صحنِ حرم میں ابتری

*********************