|
* Chehre pe mere zulf ko phailaao kisii din, *
Chehre pe mere zulf ko phailaao kisii din,
kyaa roz garajte ho baras jaao kisii din,
raazo.n kii tarah utro mere dil me.n kisii shab
dastak pe mere haath kii khul jaao kisii din,
pe.Do.n kii tarah husn kii baarish me.n nahaa luu.N,
baadal kii tarah jhuum ke ghir aao kisii din,,
Khushbuu kii tarah guzaro mere dil kii galii se,
phuulo.n kii tarah mujh pe bikhar jaao kisii din,
phir haath ko Khairaat mile band-e-qabaa kii,
phir lutf-e-shab-e-vasl ko doharaao kisii din,
guzre.n jo mere ghar se to ruk jaaye.n sitaare,
is tarah merii raat ko chamkaao kisii din,
mai.n apnii har ik saa.Ns usii raat ko de duu.N,
sar rakh ke mere siine pe so jaao kisii din.
|
|