|
* Jab mere samne tera rukh e zeba hoga, *
Jab mere samne tera rukh e zeba hoga,
Tab kaheen ja ke shab e gham ka savera hoga,
Hai mera khanah e dil Tere liye chashm baraah,
Tu na aayega agar kaise guzara hoga,
Kis tarah mere guzarte hain shab o roz na pooch,
Hoga mahsoos tujhe jab kabhi tanha hoga,
Gulbadan ,ghuncha dahan,zohra jabeen, jaan e ghazal,
Kitna purkaif o haseen tera nazara hoga,
Hai teri jalwah gah e naaz o ada hosh ruba,
Sochta hoon main sarapa tera kaisa hoga,
Hai mujhe josh e junoon mein bhi tera paas o lehaaz,
Tu ho ruswa yeh mujhe kaise gawaara hoga
Yeh teri zulf e girahgeer hai gharatgar e hosh,
Tujh ko mashshatah e fitrat ne sanwara hoga,
Tera jana hai khezaan aur tera aana hai bahaar,
Tu na hoga to yeh bekaif nazara hoga,
Teri tasveer e tasawur hai nehayat purkaif,
Hoga kya rubaru jab bhi tera jalwa hoga,
Laya yeh soz e duroon rang bilaakhir Barqi,
Ab tere samne woh husn e dilaara hoga,
|
|